مونیخده کی گؤروشمه سونراسی قاراباغدا حلل آددیملاری نین دئتایلاری

مونیخده کی گؤروشمه سونراسی قاراباغدا حلل آددیملاری نین دئتایلاری آچیقلاندی

آذربایجان لیدئری علییئو ایله ائرمنیستان جومهور باشقانی سارکیسیانین 22 نویابردا مونیخده ائتدیکلری گؤروشمه ده تأمین ائدیلن ایره لیله مه نین دئتاللاری بللی اولدو. 

  آلمانییانین مونیخ شهرینده، کئچدیگیمیز گونلرده بیر آرایا گلن ایلهام علییئو ایله سئرژ سارکیسیانین راضیلاشما اوچون فیکیر آل وئری ائتدیگی ایفاده ائدیلدی. آوروپا تهلوکه سیزلیک و امکداشلیق تشکیلاتی فرانسیز باشقانی بئرنارد فاسسیئر، آتت مینسک قروپونون دعوتی اوزرینه ائدیلن و تخمینن دؤرد ساعات داوام ائدن گؤروشمه ده ایکی لیدئرین هله تام بیر نتیجه یه چاتا بیلمه دیگینی، آنجاق "اؤنملی اینکیشافلار" قئید ائتدیگینی آچیقلامیشدی.

استار قزئتی نین یایینلادیغی خبره گؤره، فاسسیئر، ییغینجاقدا بعضی چتینلیکلری ده تعیین ائتدیگینی قئید ائتمیشدی. آلینان معلوماتلارا گؤره ایکی لیدئر، آ.ب.ش، روسییا و فرانسانین مئیدانا گتیردیگی مینسک قروپونون تعیین ائتدیگی مادرید پرینسیپ لری ایله هئلسینکی اینسان حاقلاری بیاننامه سی چرچیوه سینده اوزلاشماغا چاتماغا چالیشدیلار. ایندییه قدر مادرید پرینسیپ لرینی موذاکیره ائتمگی قبول ائتمه ین علییئو، سارکیسیان ایله سون ائتدیگی گؤروشمه ده، اولجه داغلیق قاراباغدا سون راضیلاشماغا تمل اولاجاق بیر چرچیوه راضیلاشماسی اوزرینده فیکیر آلیش-وئریشینده اولدو. ایکی لیدئر، داغلیق قاراباغین اطرافیندا ائرمنیستان ایشغالی آلتیندا اولان 7 بؤلگه دن (کئلبجر، لاچین، قوبادلی، فوضولی، زنگیلان، آغ دام، جبراییل) 5ی نین بوشالدیلماسی مؤوضوعسوندا گؤروش بیرلیگینه واردی، آنجاق بوشالدیلاجاق 5 بؤلگه نین هانسی لاری اولاجاغی دقیقلشمه دی. ائرمنیستان ایله داغلیق قاراباغ آراسینداکی علاقه نی تأمین ائدن لاچین کوریدورونون بوشالدیلماسی نین گوندمه گتیریلمه سینه، ائریوان رهبرلیگی بو مرحله ده قطعیلیکله قارشی اولدوغونو بیلدیررکن، داغلیق قاراباغین سون ستاتوسونون نه اولاجاغینا دایر قرارین، رئفئراندوم نتیجه سی تعیین اولونماسینی دا پرینسیپده اویغون گؤردو.

  علییئو، ییغینجاقدان بیر گون اول سارکیسیان ایله گؤروشمه سی نین نتیجه سیز قالماسی حالیندا، باریش اومیدلری نین توکنه جگینی، بو وضعیتده ائرمنی ایشغالی آلتینداکی تورپاقلاری قورتارماق اوچون عسگری اوصوللارا موراجیعت ائده بیله جکلرینی سؤیله میشدی. ایکی لیدئرین تکرار نه واخت بیر آرایا گله جگی ایفاده ائدیلمیر.

    روسییا، آ.ب.ش و فرانسانین علییئو ایله سارکیسیانین اؤنونه یول خریطه سی اولاراق قویدوغو مادرید پرینسیپ لری مادده لری بئله:

  • داغلیق قاراباغین اطرافیندا ایشغال ائدیلن بؤلگه لر بوشالدیلاجاق.

    • ائرمنیستان ایله داغلیق قاراباغ آراسینداکی علاقه سی تأمین ائدن کوریدور داواملی آچیق ساخلانیلاجاق.

     • کؤچمن لر آیریلماق مجبوریتینده قالدیغی تورپاقلارینا دؤنه جک.  

  • بین الخالق باریش گوجویوله یئرینه یئتیره جک هر جور بین الخالق ضمانت تأمین ائدیله جک.  

  • داغلیق قاراباغ ائرمنی لرینه لازیملی ضمانت وئریله رک اؤزلرینی ایداره ائتمه حاقلاری تانیناجاق. 

   • داغلیق قاراباغین حوقوقی ستاتوسو اوچون تشببوث ایستیفاده ائدیله جک.